कृषी उत्पन्न बाजार समिती अर्जुनी मोरगाव परिसरातील शेतकरी बांधवांसाठी एक मोठी आणि ऐतिहासिक घडामोड घडणार आहे. राज्य शासनाच्या राष्ट्रसंत तुकडोजी महाराज शेतकरी भवन योजनेअंतर्गत अर्जुनी मोरगाव कृषी उत्पन्न बाजार समितीस तब्बल रु. 1 कोटी 52 लाख 91 हजार 307 इतका निधी मंजूर झाला आहे. या निधीतून शेतकरी बांधवांसाठी अत्याधुनिक शेतकरी भवन उभारण्यात येणार आहे. या प्रकल्पामुळे शेतकऱ्यांना बाजार समिती क्षेत्रात मुक्काम, बैठक, प्रशिक्षण, कृषी मार्गदर्शन यांसाठी स्वतंत्र आणि आधुनिक सुविधा उपलब्ध होणार आहेत.
राज्यातील अनेक कृषी बाजार समित्या शेतकऱ्यांसाठी काम करतात, मात्र बहुतेक ठिकाणी शेतकऱ्यांना मुक्कामाची उचित व्यवस्था नसते. त्यामुळे राज्य शासनाच्या सहकार व पणन विभागाने शेतकरी भवन योजना सुरू केली आहे. या योजनेंतर्गत ग्रामीण भागातील शेतकरी वर्गाला आवश्यक पायाभूत सुविधा उपलब्ध करून देणे हा उद्देश आहे. या पार्श्वभूमीवर अर्जुनी मोरगाव बाजार समितीची निवड झाली असून, या ठिकाणी शेतकरी भवन उभारण्याची प्रक्रिया जलदगतीने सुरू होणार आहे.
पुणे येथील पणन संचालकांनी सादर केलेल्या प्रकल्प अहवालाला शासनाची प्रशासकीय मान्यता मिळाली असून खर्चासाठी आर्थिक मंजुरी देण्यात आली आहे. या भवनात शेतकरी विश्रामगृह, बैठकींसाठी हॉल, प्रशिक्षण केंद्र, माहिती कक्ष, स्वच्छता गृह तसेच पेयजल सुविधा यांची उभारणी केली जाणार आहे. विशेष म्हणजे या बांधकामासाठी गुणवत्ता आणि शाश्वत विकासाला प्राधान्य देण्यात येणार असल्याचे सांगितले जाते.
या संदर्भात कृषी उत्पन्न बाजार समितीचे सभापती यशवंतराव परशुरामकर यांनी प्रतिक्रिया देताना सांगितले,
“शेतकऱ्यांच्या हितासाठी राज्य शासनाने घेतलेला हा ऐतिहासिक निर्णय आहे. दीड कोटींच्या निधीतून उभे राहणारे हे भवन केवळ इमारत नसेल, तर ते शेतकऱ्यांच्या प्रगतीचे केंद्र असेल. यासाठी आम्ही राज्याचे मुख्यमंत्री, उपमुख्यमंत्री, जिल्ह्याचे पालकमंत्री तसेच आमदार राजकुमार बडोले यांचे आभार मानतो.”
अर्जुनी मोरगाव तथा परिसरातील शेतकऱ्यांसाठी ही आनंदाची बातमी असताना काही ठिकाणी याबाबत प्रश्नही उपस्थित केले जात आहेत. स्थानिक नागरिकांचा प्रश्न आहे की, मंजूर निधी वेळेत वापरला जाईल का? प्रकल्प वेळेत पूर्ण होईल का? कारण यापूर्वीही ग्रामीण भागात अनेक विकासकामांमध्ये निधीच्या विलंबामुळे प्रकल्प रेंगाळल्याचे उदाहरणे आहेत.
या संदर्भात बाजार समितीच्या अधिकाऱ्यांनी स्पष्ट केले आहे की –
- कामे पारदर्शीपणे आणि टप्प्याटप्प्याने पूर्ण केली जातील
- प्रशासकीय मान्यतेनंतर तातडीने निविदा प्रक्रिया राबवली जाईल
- शेतकऱ्यांची सुविधा लक्षात घेऊन बांधकाम दर्जेदार होईल
अर्जुनी मोरगाव परिसरातील अनेक शेतकरी वर्षानुवर्षे धान गहू, हरभरा, मक्याची विक्री करण्यासाठी बाजार समितीत येतात. परंतु दिवसभराच्या व्यवहारानंतर त्यांना मुक्कामासाठी गावोगाव फिरावे लागते. त्यामुळे प्रस्तावित शेतकरी भवनाच्या माध्यमातून त्यांना सुरक्षित आणि स्वस्त निवास सुविधा उपलब्ध होणार आहे, हे निश्चित.
शेतकरी संघटनांनी या निर्णयाचे स्वागत केले आहे. कृषी तज्ज्ञांच्या मते, हा प्रकल्प पूर्ण झाल्यास विदर्भातील कृषी विकासाच्या दिशेने मोठे पाऊल पडेल.