वाचन प्रेरणा दिवस साजरा करताना घडले काहीतरी खास; आशा सार्वजनिक वाचनालय सेंदूरवाफात घडली अनोखी घटना!
वाचन प्रेरणा दिवस हा केवळ औपचारिक उपक्रम नाही, तर ज्ञानाची नवी दारे उघडणारा आणि विचारांमध्ये सकारात्मकता निर्माण करणारा संस्कार आहे, असा संदेश देत सेंदूरवाफा येथील आशा सार्वजनिक वाचनालयात हा दिवस अत्यंत उत्साहपूर्ण वातावरणात साजरा करण्यात आला. भारतीय क्षेपणास्त्र कार्यक्रमाचे जनक, भारतरत्न आणि माजी राष्ट्रपती डॉ. ए. पी. जे. अब्दुल कलाम यांच्या जयंतीनिमित्त दरवर्षी १५ ऑक्टोबर हा वाचन प्रेरणा दिवस म्हणून साजरा केला जातो. त्यानिमित्त सेंदूरवाफा येथील वाचनालयात आयोजित कार्यक्रमाला मोठ्या संख्येने विद्यार्थी, पालक, शिक्षक आणि गावातील पुस्तकप्रेमी उपस्थित होते.
या कार्यक्रमाचे अध्यक्षस्थान सेवानिवृत्त शिक्षक पी. पी. लांजेवार यांनी भूषविले, तर वामन मुंगुलमारे हे कार्यक्रमाचे उपाध्यक्ष म्हणून उपस्थित होते. प्रमुख पाहुणे म्हणून सेवानिवृत्त शिक्षक के. जी. मडावी, डी. पी. बनकर, तसेच वाचनालयाचे सचिव ज्ञानेश्वर कापगते उपस्थित होते. कार्यक्रमात विविध मान्यवर व ग्रामीण भागातील साहित्यप्रेमी सहभागी झाले होते.
कार्यक्रमाची सुरूवात दीपप्रज्वलन व भारतमातेच्या प्रतिमेला पुष्पार्पण करून करण्यात आली. त्यानंतर उपस्थित सर्वांना ‘वाचन प्रतिज्ञा’ घ्यायला लावण्यात आली. “दररोज किमान ३० मिनिटे पुस्तकवाचन करू, वाचनातून ज्ञान घेऊ आणि समाजातील इतरांनाही वाचनाची सवय लावण्याचा प्रयत्न करू,” असा या प्रतिज्ञेचा मुख्य संदेश होता.
प्रमुख पाहुणे के. जी. मडावी यांनी आपल्या भाषणात वाचनाचे महत्त्व स्पष्ट करताना सांगितले की, “वाचन हे फक्त छंद नसून जीवन घडवणारी संस्कृती आहे. मोबाईल व सोशल मीडियाच्या युगात वाचन हरवत चालले आहे, म्हणून अशा कार्यक्रमांची ग्रामीण भागात गरज आहे.” तर डी. पी. बनकर यांनी डॉ. अब्दुल कलाम यांच्या जीवनप्रवासावर प्रकाश टाकत विद्यार्थ्यांना प्रेरणा दिली. त्यांनी सांगितले की, “डॉ. कलाम यांनी आयुष्यभर विद्यार्थ्यांना स्वप्न पहायला शिकवले. आजच्या तरुणांनीही त्यांचा आदर्श डोळ्यासमोर ठेवून ज्ञानार्जन करावे.”
कार्यक्रमात प्रत्यक्ष ३० मिनिटे वाचन उपक्रम घेण्यात आला. या उपक्रमात उपस्थित सर्वांनी शांतपणे वाचून वाचनाचे महत्त्व प्रत्यक्ष अनुभवले. विशेष म्हणजे, वाचनालय समितीने प्रत्येक वाचकाला दोन मोफत पुस्तके घर घेऊन जाण्यासाठी उपलब्ध करून दिली, ज्यामुळे कार्यक्रमाची लोकप्रियता दुप्पट झाली. विद्यार्थ्यांच्या चेहऱ्यावर उत्सुकता, तर पालकांमध्ये समाधानाचे भाव पाहायला मिळाले.
गावातील ज्येष्ठ वाचक पी. एल. रहांगडाले, योगेश्वरी झोडे, नंदू कापगते, मारुती संग्रामे, देवांगना कापगते यांच्यासह अनेक पुस्तकप्रेमींनी वाचनाचे महत्त्व सांगत आपले अनुभव व्यक्त केले. कार्यक्रमाचे सूत्रसंचालन प्रविण परशुरामकर यांनी उत्तमपणे केले, तर ज्ञानेश्वर कापगते यांनी आभार प्रदर्शन केले.
कार्यक्रमाच्या यशस्वी आयोजनासाठी वाचनालयातील पदाधिकारी व गावकऱ्यांनी विशेष परिश्रम घेतले. ग्रामीण भागात ज्ञानाचा दिवा पेटवण्यासाठी आशा सार्वजनिक वाचनालय करत असलेले हे कार्य समाजकारणाचे प्रेरणादायी उदाहरण आहे.
