उपविभागीय अधिकारी कविता गायकवाड आणि माणुसकीचा धडा, शासकीय वाहनच बनलं रुग्णवाहिका
उपविभागीय अधिकारी कविता गायकवाड यांनी दाखवलेली तत्परता, संवेदनशीलता आणि माणुसकी ही आजच्या प्रशासनासाठी प्रेरणादायी ठरत आहे. शासन ही एक यंत्रणा असली तरी ती चालविणारे अधिकारी जर संवेदनशील असतील, तर त्याचा थेट लाभ सामान्य नागरिकांपर्यंत पोहोचतो, याचा प्रत्यय देवरीच्या उपविभागीय अधिकारी कविता गायकवाड यांनी नुकताच दिला आहे.
गोंदिया जिल्ह्यातील सालेकसा येथे गुरुवारी झालेली शासकीय बैठक आटोपून सायंकाळी सुमारे ५ ते ६ वाजताच्या दरम्यान उपविभागीय अधिकारी कविता गायकवाड या देवरीकडे परतत होत्या. प्रवासादरम्यान हरदोली गावाजवळील रस्त्याच्या कडेला त्यांना एक भीषण अपघात झाल्याचे दृश्य दिसून आले. दोन व्यक्ती गंभीर जखमी अवस्थेत रस्त्याच्या कडेला पडलेल्या होत्या. आजूबाजूला गर्दी असली तरी तात्काळ मदत पोहोचलेली नव्हती.
परिस्थितीचे गांभीर्य क्षणात ओळखत उपविभागीय अधिकारी कविता गायकवाड यांनी कोणताही विलंब न करता आपले शासकीय वाहन तात्काळ थांबवण्याचे आदेश दिले. “मी अधिकारी आहे” किंवा “ही माझी जबाबदारी नाही” असा विचार न करता त्यांनी प्रथम मानवतेला प्राधान्य दिले. जखमींची अवस्था पाहून त्यांनी त्वरित निर्णय घेत दोघांनाही आपल्या शासकीय वाहनातून जवळच्या ग्रामीण रुग्णालयात दाखल केले.
वेळेवर मिळालेल्या या मदतीमुळे जखमींना तत्काळ वैद्यकीय उपचार मिळू शकले. डॉक्टरांच्या मते, काही मिनिटांचा उशीरही जीवघेणा ठरू शकला असता. मात्र उपविभागीय अधिकारी कविता गायकवाड यांच्या तत्पर निर्णयामुळे दोघांचे प्राण वाचण्यास मदत झाली.
या संपूर्ण मानवीय कार्यात त्यांच्या वाहनचालकानेही तितक्याच संवेदनशीलतेने, तत्परतेने आणि जबाबदारीच्या भावनेने सहकार्य केले. त्या क्षणी उपविभागीय अधिकारी आणि त्यांचे शासकीय वाहन हे केवळ प्रशासनाचे प्रतीक न राहता, जखमींसाठी जीवनरक्षक रुग्णवाहिका ठरले.
या घटनेची माहिती मिळताच परिसरातील नागरिक, ग्रामस्थ तसेच सामाजिक कार्यकर्त्यांमध्ये उपविभागीय अधिकारी कविता गायकवाड यांच्याबद्दल कौतुकाची भावना व्यक्त होत आहे. “प्रशासनातील अधिकारी जर अशा प्रकारे माणुसकी जपतील, तर जनतेचा प्रशासनावरील विश्वास अधिक दृढ होईल,” अशी प्रतिक्रिया अनेक नागरिकांनी दिली आहे.
आजच्या धावपळीच्या आणि तणावपूर्ण प्रशासनिक व्यवस्थेत अशा प्रकारची संवेदनशीलता दुर्मिळ होत चालली आहे. मात्र उपविभागीय अधिकारी कविता गायकवाड यांनी दाखवून दिले की अधिकार आणि कर्तव्य यापेक्षा माणुसकी मोठी आहे. त्यांच्या या स्तुत्य कार्यामुळे प्रशासनाची एक सकारात्मक, मानवीय प्रतिमा समाजासमोर उभी राहिली आहे.
निश्चितच, मानवतेने ओथंबलेल्या या प्रशंसनीय कार्यासाठी उपविभागीय अधिकारी कविता गायकवाड तसेच त्यांच्या वाहनचालकास मनापासून सलाम. अशा अधिकाऱ्यांमुळेच “शासन जनतेसाठी आहे” हा विश्वास अधिक बळकट होतो.
