सर्वात जुने ब्रिटिशकालीन तहसील साकोली विकासापासून वंचित का?
साकोली | प्रतिनिधी
सर्वात जुने ब्रिटिशकालीन तहसील म्हणून ओळखले जाणारे साकोली हे भौगोलिक, ऐतिहासिक आणि सांस्कृतिक दृष्ट्या समृद्ध असलेले शहर आजही विकासाच्या काही महत्त्वाच्या टप्प्यांवर मागे राहिले आहे. लाखनी, लाखांदूर, सडक अर्जुनी यांसारख्या तालुक्यांनी स्वायत्त झाल्यानंतर व्यापारी व पायाभूत सुविधांच्या बाबतीत मोठी झेप घेतली, मात्र साकोली मात्र जसेच्या तसे राहिले आहे.
स्थानिक व्यावसायिक आणि नागरिकांच्या मते, यामागचे प्रमुख कारण म्हणजे साकोली-सेंदूरवाफा क्षेत्रातील हायवे रोडच्या दोन्ही बाजूंच्या सरकारी भूखंडांची मालकी संरचना. खासगी मालकी हक्काच्या जागा नसल्याने इच्छित प्रमाणात व्यावसायिक वसाहत उभी राहू शकलेली नाही.
इतर शहरांमध्ये जसे किराणा बाजार, कपड्यांची गल्ली किंवा विशिष्ट वस्तूंसाठी केंद्रित व्यावसायिक विभाग असतात, तसे साकोलीत नाही. परिणामी, खेड्यापाड्यातील नागरिकदेखील खरेदीसाठी साकोलीऐवजी इतर शहरांकडे वळतात. बाजारात येणाऱ्या ग्राहकांची संख्या कमी असल्यामुळे येथील व्यवसाय वाढीला चालना मिळत नाही.
स्थानिक मागणी — हायवे लगतच्या सरकारी जागांचा व्यावसायिक विकास
साकोली-सेंदूरवाफा क्षेत्राच्या विकासासाठी आता स्थानिकांनी पुढाकार घेतला आहे. आपल्या क्षेत्राचे आमदार माननीय नानाभाऊ पटोले यांना निवेदन देऊन या समस्येकडे लक्ष वेधण्याचे ठरवले आहे.
नागरिकांची मागणी अशी आहे की, हायवेच्या दोन्ही बाजूंना असलेल्या सरकारी जागांवर नगर विकास मंत्रालय किंवा नगरपरिषद यांच्यामार्फत गाळे बांधणी योजना राबवावी. साकोली ग्रामपंचायत असताना सार्वजनिक जागेवर गाळे उभारून कमी उत्पन्न असलेल्या नागरिकांना भाडेतत्त्वावर देण्यात आले होते; त्याच धर्तीवर ही योजना हायवे क्षेत्रात लागू करावी.
तसेच, गाव तलावाचे सौंदर्यीकरण करून तलाव आणि रस्त्याच्या मधल्या मोकळ्या जागेवरदेखील गाळे उभारले जावेत. हे गाळे लकी ड्रॉ पद्धतीने सुशिक्षित बेरोजगार व कमी उत्पन्न असलेल्या नागरिकांना लिजवर किंवा भाडेतत्त्वावर देण्यात यावेत.
फायदे — नवीन बाजारपेठ आणि रोजगार संधी
ही योजना राबविल्यास साकोली-सेंदूरवाफा क्षेत्रात एक नवीन बाजारपेठ स्थापन होईल. स्थानिक व्यापारी वातावरणात नवीन ऊर्जेचा संचार होईल आणि सुशिक्षित बेरोजगारांना व्यवसायाच्या संधी मिळतील.
स्थानिकांच्या मते, अशा प्रकारचा विकास झाल्यास साकोली फक्त ऐतिहासिक ओळखीतच नाही तर व्यापार व रोजगार निर्मितीतही आघाडी घेऊ शकेल.
