कृषी विभाग आढावा बैठक आणि शाश्वत शेती दिनाचा एकत्रित उपक्रम! योजनांचा आढावा, शाश्वत शेतीसाठी ठोस भूमिका
अर्जुनी मोर | ७ ऑगस्ट २०२५
कृषी विभाग आढावा बैठक आणि शाश्वत शेती दिन या दोन महत्त्वाच्या उपक्रमांचा संगम अर्जुनी मोर येथील तहसील कार्यालयात झाला. भारतरत्न डॉ. एम. एस. स्वामिनाथन यांच्या जयंती निमित्ताने ‘शाश्वत शेती दिन’ साजरा करण्याचा निर्णय घेतला गेला. याच अनुषंगाने कृषी विभागाच्या विविध योजनांचा आढावा घेणारी बैठकही पार पडली.
या बैठकीत कृषी योजनांची अंमलबजावणी, योजनांचे शेतकऱ्यांपर्यंत पोहोचणारे फायदे, शाश्वत शेतीची गरज आणि शेतीतील अडचणी यावर मोलाची चर्चा झाली. शेती ही केवळ उपजिविकेचे साधन नसून, ग्रामीण अर्थव्यवस्थेचा कणा असल्याचे ठसवून सांगण्यात आले.
कार्यक्रमात जिल्हा परिषद अध्यक्ष लायकराम भेंडारकर, पंचायत समिती सभापती आम्रपाली डोंगरवार, उपसभापती संदीप कापगते, जिल्हा परिषद सदस्य यशवंत गणवीर, तहसीलदार अनिरुद्ध कांबळे, जिल्हा कृषी अधिकारी निलेश कानवडे, उपकृषी अधिकारी महेंद्र नेरळे, तसेच तालुका कृषी अधिकारी सुलोचना पातोडे, उपकृषी अधिकारी सूर्यवंशी जी, पंचायत समिती सदस्य, विविध गावांचे सरपंच, फार्मर प्रोड्यूसर कंपनीचे प्रतिनिधी, कृषी विभागाचे अधिकारी-कर्मचारी व शेतकरी मोठ्या संख्येने उपस्थित होते.
यावेळी ‘शाश्वत शेती’ संकल्पना केंद्रस्थानी ठेवून जैविक शेती, जलसंधारण, पीक विविधता, आणि हवामान बदलास अनुकूल शेतीचे महत्त्व अधोरेखित करण्यात आले. शेतकऱ्यांनी पारंपरिक पद्धतींबरोबरच आधुनिक तंत्रज्ञानाचा वापर करून उत्पादनक्षम आणि पर्यावरणपूरक शेती पद्धतींचा अवलंब करण्याचे आवाहन करण्यात आले.
शाश्वत शेती ही काळाची गरज असून त्यासाठी धोरणात्मक व धोरण-बाह्य पातळीवर प्रयत्न होणे गरजेचे आहे. यासाठी शासन, प्रशासन, शेतकरी आणि तज्ज्ञ यांच्यात सुसंवाद आणि सहकार्य अत्यावश्यक असल्याचे उपस्थित मान्यवरांनी सांगितले.
या उपक्रमाच्या माध्यमातून एक सकारात्मक संदेश पोहोचविण्यात आला की, कृषीविषयक योजनांचा लाभ केवळ कागदावर न राहता तो थेट शेतकऱ्यांच्या बांधावर पोहोचायला हवा. यासाठी कृषी विभाग कटिबद्ध आहे.
