नागपूरच्या दीक्षाभूमीवर राजकुमार बडोले फाउंडेशन तर्फे मोफत सिकलसेल तपासणी आणि हस्ताक्षर अभियान

अशोक विजयादशमी तथा धम्मचक्र प्रवर्तन दिन हा भारताच्या सामाजिक-धार्मिक इतिहासातील एक महान दिवस मानला जातो. प्रत्येक वर्षीप्रमाणे यंदाही लाखो अनुयायी आणि पर्यटक नागपूरच्या ऐतिहासिक दीक्षाभूमीवर एकत्र आले होते. या विशेष प्रसंगी राजकुमार बडोले फाउंडेशनने समाजाभिमुख उपक्रम राबवत वेगळी ओळख निर्माण केली.

फाउंडेशनने दीक्षाभूमीवर मोफत सिकलसेल तपासणी शिबिर आयोजित केले. सिकलसेल हा आजार विदर्भासह महाराष्ट्र आणि भारतातील अनेक भागात गंभीर स्वरूपात आढळतो. या आजाराची योग्यवेळी तपासणी व निदान केल्यास रुग्णाचे आयुष्य वाचवता येते. याच उद्देशाने फाउंडेशनने हजारो नागरिकांची मोफत तपासणी करून जनजागृती केली. तपासणीसाठी विशेष तज्ञ डॉक्टरांची टीम उपलब्ध होती.

याचसोबत आणखी एक महत्वाचा सामाजिक उपक्रम हाती घेण्यात आला. भारतभरातील नवबौद्धांना अनुसूचित जातीचे सर्व कायदेशीर लाभ मिळावेत यासाठी हस्ताक्षर अभियान राबविण्यात आले. आजही अनेक राज्यांमध्ये नवबौद्धांना अनुसूचित जातींचे हक्क पूर्णपणे उपलब्ध नाहीत. शिक्षण, नोकरी, राजकीय प्रतिनिधित्व आणि सामाजिक न्याय या क्षेत्रात त्यांना येणाऱ्या अडचणी लक्षात घेता या अभियानाला प्रचंड प्रतिसाद मिळाला. हजारो नागरिकांनी आपले समर्थन नोंदवून नवबौद्ध समाजाच्या न्याय्य हक्कांसाठी एकजूट दाखवली.

फाउंडेशनच्या वतीने सांगण्यात आले की, “डॉ. बाबासाहेब आंबेडकर यांनी दिलेल्या बौद्ध धम्माच्या मार्गावर चालताना नवबौद्ध समाजाला न्याय मिळावा, समानतेचे हक्क मिळावेत आणि राज्यघटनेत दिलेल्या सर्व सुविधा प्रत्यक्षात पोहोचाव्यात, यासाठी या अभियानाची सुरुवात झाली आहे.”

दीक्षाभूमीवर उभारण्यात आलेल्या स्टॉल क्रमांक 242B आणि 242C येथे या दोन महत्त्वाच्या उपक्रमांची अंमलबजावणी करण्यात आली. येणाऱ्या भाविकांनी मोठ्या उत्साहाने सिकलसेल तपासणी केली आणि हस्ताक्षर अभियानात भाग घेतला.

या दोन्ही उपक्रमांमुळे दीक्षाभूमीवर आलेल्या नागरिकांना आरोग्य व सामाजिक न्याय या दोन मूलभूत गरजांशी जोडले गेले. एकीकडे आरोग्यदायी समाजाच्या निर्मितीसाठी सिकलसेल तपासणी तर दुसरीकडे सामाजिक समानतेसाठी हस्ताक्षर अभियान असे दुहेरी उद्दिष्ट साध्य झाले.

या कार्यक्रमाच्या यशस्वी आयोजनासाठी राजकुमार वडोले फाउंडेशनचे सदस्य रात्रंदिवस परिश्रम घेत होते. यात राकेश भास्कर, प्रशांत शहारे, हर्षद साखरे, मिथुन टेंभुर्णे, प्रफुल्ल कांबळे, गगन खोब्रागडे, जयश्री भास्कर, अजय शहारे, रणजीत शहारे, भारत शहारे, अॅड. विवेक इंगळे, शशिकांत जांभुळकर, पृथ्वीराज बोरकर यांचा विशेष सहभाग होता. त्यांच्या अथक प्रयत्नांमुळे हा सामाजिक उपक्रम यशस्वी झाला.

राजकुमार बडोले फाउंडेशनच्या या कार्याचे सर्वत्र कौतुक होत असून समाजात सकारात्मक बदल घडवण्यासाठी हे पाऊल एक प्रेरणादायी ठरले आहे. धम्मचक्र प्रवर्तन दिनानिमित्त नागपूरच्या दीक्षाभूमीवर घडलेला हा उपक्रम दीर्घकाळ लक्षात राहील, यात शंका नाही.