५० वर्षांपासून बंद असलेले दीक्षाभूमीचे उत्तरद्वार पुन्हा उघडणार? राजकुमार बडोले यांची मागणी
📍 मुंबई, महाराष्ट्र विधानभवन – महाराष्ट्र विधानसभेच्या पावसाळी अधिवेशन २०२५ च्या तेराव्या दिवशी एक महत्त्वाचा मुद्दा विधानसभेत मांडण्यात आला. दीक्षाभूमी – ही बाबासाहेब डॉ. बाबासाहेब आंबेडकर यांच्या धर्मांतराचा ऐतिहासिक साक्षीदार असलेली जागा – दरवर्षी लाखो अनुयायांचे श्रद्धास्थान ठरते. मात्र, या जागेचा एक महत्वाचा भाग, म्हणजे उत्तरेकडील प्रवेशद्वार, अनेक वर्षांपासून बंद आहे.
आमदार राजकुमार बडोले, माजी सामाजिक न्याय मंत्री आणि अर्जुनी मोरगाव विधानसभा मतदारसंघाचे प्रतिनिधी, यांनी याबाबत विधानसभेत थेट आवाज उठवला. त्यांनी सांगितले की, १९६८-६९ साली महाराष्ट्र शासनाने दीक्षाभूमीच्या उत्तर बाजूची जागा कृषी संशोधनासाठी पंजाबराव देशमुख कृषी विद्यापीठ, अकोला यांच्याकडे वर्ग केली होती.
परंतु, आजतागायत त्या जागेचा कोणताही उपयोग झालेला नाही. उलट, त्या ठिकाणी जंगल वाढले आहे, अतिक्रमण वाढले आहे, आणि त्या भागातील जागा निष्प्रभ झाली आहे. या पार्श्वभूमीवर, बडोले यांनी विधानसभेत ठाम मागणी केली की, “दीक्षाभूमीच्या परिसरात वाढत्या गर्दीला सामोरे जाण्यासाठी त्या जागेचे अधिग्रहण करून ती परत मिळवावी आणि अनुयायांसाठी आवश्यक पायाभूत सुविधा उभाराव्यात.”
त्यांनी पुढे नमूद केले की, “या प्रकरणाकडे सातत्याने दुर्लक्ष होत असल्यामुळे, दीक्षाभूमीच्या विकासाला अडथळा येत आहे. हजारो-लाखो अनुयायी दरवर्षी येथे येतात, परंतु निवास, स्वच्छता, वाहतूक व्यवस्था यांचा अभाव प्रकर्षाने जाणवतो. यामुळे सरकारने तात्काळ निर्णय घेणे गरजेचे आहे.”
बडोले यांच्या या सशक्त मागणीमुळे नागपूर शहरातील दीक्षाभूमीच्या उत्तर प्रवेशद्वाराचा प्रश्न पुन्हा एकदा चर्चेत आला आहे, आणि हे प्रकरण आता राजकीय पटलावर गांभीर्याने घेतले जाण्याची शक्यता आहे.
