३० वर्षांची प्रतीक्षा संपणार? झाशीनगर उपसा सिंचन योजनेला चालना…
गोंदिया, १६ जुलै २०२५ – झाशीनगर उपसा सिंचन योजना, गेली ३० वर्षे रखडलेली, आता अखेर मार्गी लागण्याची शक्यता आहे. महाराष्ट्र विधानसभेच्या पावसाळी अधिवेशनात आज अर्जुनी मोरगावचे आमदार राजकुमार बडोले यांनी हा गंभीर प्रश्न उपस्थित केला. सिंचनाचा अभाव भोगणाऱ्या हजारो शेतकऱ्यांसाठी ही योजना जीवनरेषा ठरू शकते, असे त्यांनी स्पष्ट केले.
झाशीनगर उपसा सिंचन योजनेचे केवळ १० टक्के काम अपूर्ण आहे. परंतु वनजमिनींचा वारंवार बदलणारा दर्जा – राखीव वन, अभयारण्य, राष्ट्रीय उद्यान – या अडचणींमुळे प्रकल्प पूर्णत्वास येत नाही. आमदार बडोले यांनी अधिवेशनात सांगितले की, नवीन तंत्रज्ञानाच्या साहाय्याने फक्त ३० मीटर दगड हटवणे शक्य आहे, आणि यासाठी वनविभागानेही मान्यता दिलेली आहे. हे शक्य झाल्यास तब्बल ३,५०० हेक्टर क्षेत्र सिंचनाखाली येईल.
तसेच, डोंगरगाव वितरेकेच्या निकृष्ट बांधकामाचा मुद्दा उपस्थित करत, आमदार बडोले यांनी स्वस्तिक कंस्ट्रक्शन कंपनीच्या निष्काळजी कारभारावर प्रश्नचिन्ह उपस्थित केले. एका वर्षातच काम खचल्याने लाखोंचा सरकारी निधी वाया गेल्याची बाब त्यांनी अधोरेखित केली. त्यांनी दिशाभूल करणाऱ्या अधिकाऱ्यांवर कारवाईची मागणी केली.
या चर्चेला उत्तर देताना जलसंपदा मंत्री गिरीश महाजन यांनी प्रकल्प पूर्णत्वासाठी तातडीने बैठक घेऊन केंद्र सरकारकडे पाठपुरावा करण्याचे आश्वासन दिले. त्यांनी चौकशी करून दोषींवर कारवाईही करण्यात येईल, असे सांगितले.
गोंदिया जिल्ह्याच्या शेतकऱ्यांचे भविष्य ठरवणाऱ्या या योजनांना आता गती मिळणार का? – हा प्रश्न सध्या चर्चेचा विषय ठरतो आहे.
