मोटारसायकल अपघातात सुमेध रामटेके यांचा दुर्दैवी मृत्यू; आमदार बडोले यांनी घरी जाऊन कुटुंबीयांचे सांत्वन केले
गोंदिया जिल्ह्यातील बोंडगाव देवी येथे एक हृदयद्रावक घटना घडली आहे. गावातील रहिवासी सुमेध जयदेव रामटेके यांचा दुर्दैवी मोटारसायकल अपघातात मृत्यू झाला. ही घटना संपूर्ण परिसरात शोककळा पसरवणारी ठरली आहे. सुमेध रामटेके हे एक उमदं, कर्तबगार व मनमिळावू व्यक्तिमत्त्व होते. त्यांच्या अचानक जाण्याने गावात हळहळ व्यक्त करण्यात येत आहे.
अपघाताची घटना दु:खद असून, सुमेध हे नेहमीप्रमाणे गावात आपल्या मोटारसायकलने जात असताना अचानक समोरून येणाऱ्या वाहनाची जोरदार धडक बसल्याने त्यांचा जागीच मृत्यू झाला. स्थानिक नागरिकांनी तत्काळ त्यांना रुग्णालयात दाखल केले, मात्र डॉक्टरांनी त्यांना मृत घोषित केले. ही बातमी वाऱ्यासारखी गावभर पसरली आणि गावामध्ये शोककळा पसरली.
या पार्श्वभूमीवर माजी मंत्री आणि आमदार राजकुमार बडोले यांनी स्वखर्चाने सुमेध रामटेके यांच्या घरी भेट दिली. त्यांनी कुटुंबीयांची आस्थेने विचारपूस केली आणि त्यांचे सांत्वन केले. बडोले यांनी रामटेके कुटुंबाच्या दु:खात सहभागी होत, त्यांच्या भावनांना हात घातला.
राजकुमार बडोले म्हणाले, “सुमेध यांचे जाणे म्हणजे गावासाठी आणि परिवारासाठी अपूरणीय नुकसान आहे. एक होतकरू तरुण, जो समाजाच्या मुख्य प्रवाहात आपलं स्थान निर्माण करत होता, तो इतक्या अकाली गेला हे फारच वेदनादायक आहे.”
यावेळी स्थानिक ग्रामस्थ, युवक, कार्यकर्ते मोठ्या संख्येने उपस्थित होते. अनेकांनी सुमेधच्या आठवणी सांगत, त्यांच्या साधेपणाचा, नम्र स्वभावाचा आणि समाजकार्यासाठी असलेल्या ओढीचा उल्लेख केला.
सामाजिक कार्यात नेहमी पुढे असणारे सुमेध रामटेके हे युवकांमध्ये लोकप्रिय होते. त्यांच्या जाण्याने एक उमेदीचा दिवा विझल्यासारखं वाटत आहे. बडोले यांनी जिल्हा प्रशासनाकडे रामटेके कुटुंबास आवश्यक मदतीची शिफारस केली आहे.
