ओबीसींना जातनिहाय जनगणना हवीच!

गोंदिया | प्रतिनिधी

ओबीसींना जातनिहाय जनगणना हवीच, हा ठाम संदेश नवेगावबांध येथे झालेल्या मंडल जनजागृती यात्रेच्या भव्य प्रबोधन मेळाव्यातून देण्यात आला. या मेळाव्यात ओबीसी युवा अधिकार मंचाचे प्रमुख संयोजक खेमेंद्र कटरे यांनी ओबीसी समाजाच्या खऱ्या लोकसंख्येची नोंद आणि योजनांच्या प्रभावी अंमलबजावणीसाठी जातनिहाय जनगणना अपरिहार्य असल्याचे ठासून सांगितले.

कटरे म्हणाले, “अनुसूचित जाती-जमातींप्रमाणेच ओबीसींसाठी जनगणनेत स्वतंत्र कॉलम असलेला तक्ता हवा. अन्यथा खरी लोकसंख्या स्पष्ट होणार नाही आणि निधी वितरणात अन्याय होईल.” त्यांनी शासनाला आवाहन केले की, ओबीसी विकासासाठी डेटा-आधारित धोरणे आवश्यक आहेत. केंद्र व राज्य सरकारे निधी वाटपासाठी आकडेवारीवर आधारित धोरणे तयार करतात, त्यामुळे आपल्या समाजाची खरी लोकसंख्या जनगणनेत मांडणे अत्यंत गरजेचे आहे.

ओबीसी वसतिगृहांची गरज अधोरेखित

कटरे यांनी सांगितले की, सध्या राज्यात फक्त ५४ वसतिगृहं ओबीसींसाठी कार्यरत आहेत, तर तालुके ७२० आहेत. प्रत्येक तालुक्यात एक वसतिगृह सुरू करण्यासाठी एकजूट आवश्यक आहे. येत्या १ ऑगस्टपासून सुरू झालेल्या ओबीसी वसतिगृह प्रवेश प्रक्रियेत अधिकाधिक विद्यार्थ्यांनी ऑनलाईन अर्ज करावेत, जेणेकरून शासनाला विद्यार्थ्यांच्या वास्तविक गरजा कळतील आणि धोरणबदल होईल.

मंडल यात्रेचे सामाजिक योगदान

मुख्य मार्गदर्शक म्हणून उपस्थित असलेल्या उमेश कोराम यांनी सांगितले की, मागील पाच वर्षांपासून मंडल यात्रा तळागाळापर्यंत पोहोचून सामाजिक न्याय आणि ओबीसी हक्कांसाठी प्रभावी आवाज बनली आहे. ही यात्रा ओबीसींना मंडल आयोगाच्या शिफारशींबरोबरच जातनिहाय जनगणनेचे महत्त्व पटवून देत आहे. याचबरोबर महाज्योती संस्था व ओबीसी वसतिगृहांविषयीची माहिती विद्यार्थ्यांपर्यंत व पालकांपर्यंत पोहोचवणे हेही यात्रेचे उद्दिष्ट आहे.

राजकीय आरक्षणाचा मुद्दा

या मेळाव्यात शैलेश जयस्वाल यांनी ओबीसींना राजकीय आरक्षण नसल्यामुळे भोगाव्या लागणाऱ्या अडचणींवर भाष्य केले. त्यांनी स्पष्ट सांगितले की, राजकीय संस्था व समित्यांमध्ये ओबीसींचे प्रतिनिधीत्व कमी असल्याने धोरणांमध्ये अन्याय होतो, आणि हा अन्याय थांबवायचा असेल तर जातनिहाय जनगणना अनिवार्य आहे.
जिल्हा बँकेचे संचालक गंगाधर परशुरामकर यांनी पक्षभेद व मतभेद विसरून या चळवळीत सहभागी होण्याचे आवाहन केले.

भव्य स्वागत व संघटनांचा उत्साह

ओबीसी, भटके विमुक्त आणि एसबीसी समाजाच्या हक्कांसाठी दरवर्षी काढली जाणारी मंडल जनजागृती यात्रा अर्जुनी मोरगाव तालुक्यातील धाबे टेकडी (आदर्श गाव) येथे पोहोचल्यावर ओबीसी अधिकार मंच, मराठा सेवा संघ, बहुजन युवा मंच आदी संघटनांनी भव्य स्वागत केले. शाळकरी विद्यार्थ्यांनीही उत्साहाने यात्रेत सहभाग नोंदवला.

प्रमुख उपस्थिती

या प्रसंगी प्रेमलाल साठवणे, टोकेश हरिणखेडे, अतुल सतदेवे, मनोज मेश्राम, वसंत गवळी, मनोहर भावे, मनोज बंसोड, सुरेंश खोब्रागडे, बाबुलाल नेवारे, रविचंद्र देशमुख, रामदास बोरकर, किशोर तरोणे यांच्यासह मंडल यात्रेतील सहकारी व स्थानिक नागरिक उपस्थित होते.

समारोप

या यात्रेमुळे नवेगावबांध परिसरात ओबीसी समाजात नवचैतन्य निर्माण झाले असून, शासनापर्यंत मागण्या पोहोचवण्यासाठी हा एक महत्त्वाचा टप्पा ठरला आहे. हा आवाज आता तालुक्यापासून ते दिल्लीपर्यंत पोहोचेल, असा विश्वास व्यक्त करण्यात आला.
संचालन अतुल सतदेवे यांनी केले तर आभार मिथुन मेश्राम यांनी मानले.