बागेश्वर धाममधील पुत्रयोगाचा दावा फोल ठरल्याने नवा वाद

स्थान: वार्ता प्रतिनिधि अर्जुनी/मोरगांव जि.गोदिया

बागेश्वर धाममध्ये कथितरीत्या करण्यात आलेल्या पुत्रयोगाच्या दाव्यावरून सध्या मोठा वाद निर्माण झाला आहे. उत्तर प्रदेशातील झाशी येथील एका दाम्पत्याला चौथ्या अपत्याच्या रूपाने मुलाऐवजी मुलगी झाल्याचा दावा संबंधित कुटुंबाने केला असून, या प्रकरणी अखिल भारतीय अंधश्रद्धा निर्मूलन समितीकडे तक्रार दाखल करण्यात आली आहे. या संपूर्ण प्रकरणामुळे धार्मिक आणि चमत्कारांच्या दाव्यांवर पुन्हा एकदा गंभीर प्रश्नचिन्ह उपस्थित झाले आहेत. मिळालेल्या माहितीनुसार, उत्तर प्रदेशातील झाशी येथील मगरवाडा भागात राहणारे राजेंद्र कुमार हे मे २०२४ मध्ये आपल्या पत्नीसह मध्य प्रदेशातील बागेश्वर धाम येथे गेले होते. तेथे बागेश्वर धामचे प्रमुख धीरेंद्र कृष्ण शास्त्री यांच्या दरबारात कथितरीत्या काढण्यात आलेल्या चिठ्ठीमध्ये किंवा पर्चीमध्ये त्यांच्या पत्नीला प्रेतबाधा असल्याचे सांगण्यात आले होते. तसेच याच पर्चीमध्ये भविष्यात पुत्रयोग असल्याचे नमूद करण्यात आले होते, असा दावा या कुटुंबाकडून करण्यात आला आहे. संबंधित दाम्पत्याला याआधीच तीन मुली होत्या आणि त्यांना वंशाचा दिवा म्हणून मुलगा हवा होता. बागेश्वर धाममधील या कथित दाव्यावर पूर्ण विश्वास ठेवून या दाम्पत्याने चौथ्या अपत्याचे नियोजन केले होते. या दाव्यामुळे त्यांच्या मनात मुलगाच होईल अशी ठाम श्रद्धा निर्माण झाली होती. त्यानुसार ११ जून २०२६ रोजी राजेंद्र कुमार यांच्या पत्नीने चौथ्या अपत्याला जन्म दिला. मात्र, अपेक्षेप्रमाणे मुलगा जन्माला न येता पुन्हा एकदा मुलीचा जन्म झाला. या घटनेनंतर संबंधित कुटुंबाला मोठा धक्का बसला आणि त्यांनी बागेश्वर धाममध्ये वर्तवण्यात आलेल्या भविष्याची सत्यता तपासण्यास सुरुवात केली. बाबांच्या पर्चीमधील दावा खोटा ठरल्याचे स्पष्ट झाल्यानंतर या कुटुंबाने या प्रकारावर उघडपणे नाराजी व्यक्त केली आणि फसवणूक झाल्याचा आरोप केला. या प्रकरणी त्यांनी अखिल भारतीय अंधश्रद्धा निर्मूलन समितीशी संपर्क साधून दाद मागितली आहे. अंधश्रद्धा निर्मूलन समितीचे प्रतिनिधी हरीश देशमुख यांनी या प्रकरणाची गंभीर दखल घेत या संपूर्ण प्रकरणाची वैज्ञानिक पद्धतीने कसून चौकशी आणि पडताळणी करण्याची गरज असल्याचे म्हटले आहे. अशा प्रकारच्या दाव्यांमुळे समाजातील अंधश्रद्धा कशी वाढीस लागते आणि सामान्य नागरिक कसे दिशाभूल होतात, यावर अंनिसच्या वतीने सातत्याने बोट ठेवण्यात येते. या प्रकरणात पीडित कुटुंबाला कायदेशीर मदत देण्याबाबत आणि पोलीस प्रशासनाकडे अधिकृत तक्रार दाखल करण्याबाबत अंनिसच्या वतीने विचार सुरू असल्याची माहिती समोर आली आहे. दरम्यान, चौथ्या अपत्याच्या रूपाने पुन्हा मुलगी झाल्यानंतरही संबंधित वडिलांनी निराश न होण्याचा निर्णय घेतला आहे. मिळालेल्या माहितीनुसार, राजेंद्र कुमार यांनी जन्माला आलेल्या या मुलीचे उत्तम संगोपन करण्याचा आणि तिला चांगल्या दर्जाचे शिक्षण देऊन भविष्यात एक मोठी अधिकारी बनवण्याचा दृढ निर्धार व्यक्त केला आहे. मुलाच्या अपेक्षेपोटी अनेकदा मुलींच्या जन्माकडे दुर्लक्ष केले जाते किंवा कुटुंबात नैराश्य येते, मात्र या प्रकरणात वडिलांनी घेतलेली ही सकारात्मक भूमिका अनेकांसाठी दिलासादायक मानली जात आहे. मात्र असे असले तरी, धार्मिक स्थळांवर अशा प्रकारचे भविष्य वर्तवून नागरिकांच्या भावनांशी खेळले जात असल्याचा आरोप या निमित्ताने पुन्हा एकदा एरणीवर आला आहे. अंधश्रद्धा निर्मूलन समिती आणि अन्य पुरोगामी संघटनांनी या प्रकारावर तीव्र आक्षेप घेतला असून, वैज्ञानिक दृष्टिकोन बाळगण्याचे आवाहन नागरिकांना केले आहे. या संपूर्ण प्रकरणाची सध्या उत्तर प्रदेश आणि मध्य प्रदेशच्या वर्तुळात जोरदार चर्चा सुरू असून, भविष्यात यावर काय कायदेशीर व सामाजिक पावले उचलली जातात, याकडे सर्वांचे लक्ष लागले आहे.