साकोली-चंद्रपूर बसफेरी ऐनवेळी रद्द; प्रवाशांची मोठी तारांबळ

स्थान: Sakoli bhandara

बहुजन हिताय, बहुजन सुखाय हे ब्रीदवाक्य समोर ठेवून लाखो प्रवाशांच्या सेवेसाठी अहोरात्र झटणाऱ्या महाराष्ट्र राज्य मार्ग परिवहन महामंडळाचा म्हणजेच एसटीचा कारभार अनेकदा प्रवाशांसाठी मनस्ताप ठरत असल्याचे पुन्हा एकदा समोर आले आहे. साकोली बसस्थानकावरून सुटणारी महत्त्वाची साकोली ते चंद्रपूर ही बसफेरी सोमवारी, ५ ऑक्टोबर रोजी कोणतीही पूर्वसूचना न देता अचानक रद्द करण्यात आली. ऐनवेळी बस रद्द झाल्यामुळे सकाळीच स्थानकावर दाखल झालेल्या शेकडो प्रवाशांची मोठी गैरसोय आणि तारांबळ उडाली. या प्रकारामुळे संतप्त झालेल्या प्रवाशांनी प्रशासनाच्या कारभाराबाबत तीव्र नाराजी व्यक्त केली असून, ऐन प्रवासाच्या वेळी बस रद्द होण्यामागच्या कारणांचा शोध घेण्याची मागणी जोर धरू लागली आहे. साकोली आगारातून दररोज सकाळी ठीक आठ वाजता चंद्रपूरसाठी ही बसफेरी सोडण्यात येते. या बसमार्गावर प्रवास करणाऱ्या प्रवाशांची संख्या नेहमीच मोठी असते. यामध्ये प्रामुख्याने महाविद्यालयात जाणारे विद्यार्थी, शासकीय व निमशासकीय कार्यालयात नोकरी करणारे कर्मचारी, वेगवेगळ्या कामांसाठी बाहेरगावी जाणारे व्यावसायिक, मजूर तसेच रोजच्या कामासाठी ये-जा करणारे अनेक नागरिक समाविष्ट असतात. सोमवार हा आठवड्याचा पहिला दिवस असल्याने कार्यालये, शाळा आणि महाविद्यालयांमध्ये जाणाऱ्यांची संख्या नेहमीपेक्षा जास्त असते. यामुळे सकाळी लवकरच साकोली बसस्थानकावर प्रवाशांची मोठी गर्दी जमली होती. ठरलेल्या वेळेनुसार सर्व प्रवासी बसची वाट पाहण्यासाठी स्थानकात उभे होते; परंतु आठ वाजले तरी चंद्रपूर जाणारी बसप्लॅटफॉर्मवर आली नाही. वेळ निघून जात असल्याने प्रवाशांच्या मनात शंकेची पाल चुकचुकली. काही वेळ प्रतीक्षा केल्यानंतर संतप्त प्रवाशांनी थेट बसस्थानकातील चौकशी कक्षाकडे धाव घेतली आणि बसबद्दल विचारणा केली. त्यावेळी साकोली ते चंद्रपूर ही बसफेरी आज रद्द करण्यात आल्याचे अत्यंत साध्या पद्धतीने कर्मचाऱ्यांनी सांगितले. कोणतीही पूर्वसूचना किंवा घोषणा न देता ही बसफेरी रद्द केल्याचे समजताच प्रवाशांचा पारा चढला आणि स्थानकात एकच संताप व संभ्रम निर्माण झाला. आगाराच्या या मनमानी कारभारावर प्रवाशांनी रोष व्यक्त केला. जर बसफेरी रद्द करायची होती, तर त्याची पूर्वकल्पना आदल्या दिवशी किंवा सकाळी तरी देणे आवश्यक होते, जेणेकरून प्रवाशांना पर्यायी व्यवस्था करता आली असती. मात्र, कोणत्याही प्रकारची अधिकृत सूचना न दिल्यामुळे अनेकांचे कामाचे तास वाया गेले, तर विद्यार्थ्यांना परीक्षा किंवा वर्ग चुकण्याची भीती निर्माण झाली. या अचानक घडलेल्या प्रकारामुळे अनेकांना ताटकळत उभे राहावे लागले. बऱ्याच प्रवाशांना महत्त्वाच्या कामासाठी पोहोचायचे असल्याने त्यांनी नाइिलाजाने खासगी वाहनांचा किंवा इतर पर्यायी वाहतुकीचा आधार घेतला. खासगी वाहनांनी जादा भाडे वसूल केल्यामुळे प्रवाशांच्या खिशालाही मोठा फटका बसला. एसटी महामंडळाच्या अशा अनियोजित कारभारामुळे सर्वसामान्यांना दररोजच नाहक आर्थिक आणि मानसिक त्रासाला सामोरे जावे लागते, असा सूर प्रवाशांमधून उमटत आहे. साकोली आणि चंद्रपूर दरम्यानचा हा मार्ग व्यावसायिक व शैक्षणिक दृष्टिकोनातून अतिशय महत्त्वाचा मानला जातो. या मार्गावरून धावणाऱ्या बसेस बहुतांश वेळा भरगच्च असतात. प्रवाशांची ही वाढती गरज लक्षात घेता एसटी प्रशासनाने वेळेचे नियोजन करणे गरजेचे असताना, ऐनवेळी बसेस रद्द होण्याचे प्रकार वारंवार घडत असल्याने नागरिकांमध्ये तीव्र असंतोष पसरला आहे. या प्रकरणाची दखल वरिष्ठ पातळीवर घेऊन संबंधित दोषी कर्मचाऱ्यांवर किंवा प्रशासकीय अधिकार्‍यांवर कारवाई करावी, अशी मागणी प्रवाशांकडून होत आहे. प्रवाशांच्या सुरक्षित आणि खात्रीशीर प्रवासासाठी ओळखली जाणारी एसटी यंदा अशा कारभारांमुळे अडचणीत सापडत असून, भविष्यात अशा प्रकारच्या घटनांची पुनरावृत्ती टाळण्यासाठी प्रशासनाने अधिक गांभीर्याने पावले उचलणे गरजेचे बनले आहे.