ई-कचरा व्यवस्थापनासाठी अर्जुनी मोरगावमध्ये जनजागृती; महाविद्यालय आणि नगरपंचायतीची संयुक्त रॅली

स्थान: अर्जुनी/मोरगाव

अर्जुनी/मोरगाव, दि. ५ नोव्हेंबर २०२६ : घराघरांत वाढणाऱ्या इलेक्ट्रॉनिक वस्तूंच्या वापरासोबत ई-कचऱ्याचे प्रमाणही वाढत आहे. जुने मोबाईल, संगणक, बॅटरी आणि इतर इलेक्ट्रॉनिक उपकरणांची योग्य विल्हेवाट न लावल्यास पर्यावरण आणि मानवी आरोग्यावर गंभीर परिणाम होऊ शकतात. याच पार्श्वभूमीवर ई-कचऱ्याचे संकलन, वर्गीकरण आणि योग्य व्यवस्थापन याबाबत नागरिकांमध्ये जागरूकता निर्माण करण्यासाठी अर्जुनी/मोरगाव येथे जनजागृती कार्यक्रम आणि रॅलीचे आयोजन करण्यात आले.

शिवप्रसाद सदानंद जायस्वाल महाविद्यालयातील भौतिकशास्त्र विभाग आणि नगरपंचायत, अर्जुनी/मोरगाव यांच्या संयुक्त विद्यमाने हा उपक्रम राबविण्यात आला. कार्यक्रमाच्या अध्यक्षस्थानी श्री दुर्गा शिक्षण संस्थेचे सहसचिव मयंक जायस्वाल होते. महाविद्यालयाचे कार्यकारी प्राचार्य डॉ. भारत राठोड, IQAC समन्वयक डॉ. लक्ष्मीकांत कापगते, कार्यक्रम समन्वयक तथा भौतिकशास्त्र विभागप्रमुख डॉ. डी. एल. चौधरी, ग्रंथपाल प्रा. अजय राऊत आणि प्रा. पंकज उके यांची प्रमुख उपस्थिती होती.

ई-कचऱ्याचे दुष्परिणाम आणि योग्य व्यवस्थापन

कार्यक्रमाची सुरुवात डॉ. डी. एल. चौधरी यांच्या प्रास्ताविकाने झाली. त्यांनी ई-कचऱ्याचे वाढते प्रमाण, त्याचा पर्यावरणावर आणि मानवी आरोग्यावर होणारा संभाव्य परिणाम याबाबत माहिती दिली. इलेक्ट्रॉनिक वस्तू वापरण्यायोग्य राहिल्या नाहीत म्हणून त्या सामान्य कचऱ्यात टाकणे योग्य नाही. त्यांचे स्वतंत्र संकलन, पुनर्वापर आणि अधिकृत केंद्रांमार्फत पुनर्प्रक्रिया करणे आवश्यक असल्याचे त्यांनी स्पष्ट केले.

यावेळी त्यांनी Reduce, Reuse आणि Recycle अर्थात वापर कमी करणे, वस्तूंचा पुनर्वापर करणे आणि पुनर्प्रक्रिया करणे या त्रिसूत्रीचा अवलंब करण्याचे आवाहन केले. दैनंदिन जीवनात या सवयी रुजल्यास ई-कचऱ्याचे प्रमाण नियंत्रित ठेवण्यास मदत होऊ शकते, असा संदेश त्यांनी दिला.

विद्यार्थी आणि नागरिकांच्या सहभागावर भर

कार्यकारी प्राचार्य डॉ. भारत राठोड यांनी पर्यावरण संवर्धनासाठी विद्यार्थी आणि नागरिकांनी सक्रिय सहभाग घेण्याची आवश्यकता व्यक्त केली. पर्यावरण संरक्षण ही केवळ प्रशासनाची जबाबदारी नसून प्रत्येक नागरिकाने आपल्या दैनंदिन सवयींमध्ये बदल करून त्यासाठी योगदान देणे गरजेचे असल्याचे त्यांनी नमूद केले.

अध्यक्षीय भाषणात मयंक जायस्वाल यांनी अशा जनजागृतीपर उपक्रमांमुळे समाजात पर्यावरणविषयक जबाबदारीची जाणीव निर्माण होते, असे सांगितले. महाविद्यालय आणि नगरपंचायतीने एकत्रितपणे राबविलेल्या या उपक्रमाचे त्यांनी कौतुक केले.

नगरपंचायतीच्या सहकार्याने ई-कचरा संकलन

नगरपंचायत अर्जुनी/मोरगावचे मुख्याधिकारी ज्ञानेश सोनवणे यांनी कार्यक्रमाच्या यशस्वीतेसाठी मागील दोन दिवसांपासून घंटागाडीच्या माध्यमातून ई-कचरा संकलित करण्यासाठी सहकार्य केले. तसेच महाविद्यालयाच्या वतीने आयोजित करण्यात येणाऱ्या जनजागृती रॅलीला नागरिकांनी सहकार्य करावे, असे आवाहन करण्यात आले होते.

त्यानुसार महाविद्यालय आणि नगरपंचायतीच्या संयुक्त पुढाकारातून रॅली काढण्यात आली. महाविद्यालयाच्या परिसरातून सुरू झालेली ही रॅली मुख्य बसस्थानक, सिव्हिल लाईन परिसर आणि मुख्य बाजारपेठेतून मार्गक्रमण करीत पुन्हा महाविद्यालयात पोहोचली. या दरम्यान विविध ठिकाणांहून ई-कचरा संकलित करण्यात आला. नागरिकांना ई-कचऱ्याचे स्वतंत्र संकलन, वर्गीकरण आणि योग्य व्यवस्थापन याबाबत माहिती देण्यात आली.

अनेक मान्यवर आणि विद्यार्थ्यांचे सहकार्य

या उपक्रमाला नगरपंचायतीचे कर्मचारी दिलीप उके, निखिल बंड, शुभम गोरकार, योगेश्वरी मेश्राम, दीप्ती भाजीपाले, दुर्योधन नेवारे, शिल्पा सांडेकर, दीपक डोंगरवार, दीपक राऊत, नयनकुमार सहारे, अनुज जांभुळकर, सुरेश बोरीकर, महेश राऊत, अश्विनी सहारे आणि तेजस्वी निमजे उपस्थित होते. महाविद्यालयातील शिक्षक व शिक्षकेतर कर्मचाऱ्यांनीही सहभाग नोंदविला.

कार्यक्रमाच्या आयोजनासाठी प्रा. अजय राऊत, प्रा. पंकज उके, डॉ. आशिष कावळे, डॉ. नितीन विलायतकर, संदीप हातझाडे, अजिंक्य लाडे, कृतिका नाकाडे, निर्भय बोरकर, सलोनी लंजे, स्नेहा, शारदा गोटे, रुपाली हटवार, निशा रॉय, योगेश, रेशमा, प्रफुल्ल, प्रवीण मसराम, बादल लाडे तसेच राष्ट्रीय सेवा योजनेच्या विद्यार्थ्यांनी विशेष सहकार्य केले.

ई-कचरा सामान्य कचऱ्यात न टाकता स्वतंत्रपणे संकलित करून अधिकृत पुनर्प्रक्रिया केंद्राकडे पाठवावा, असे आवाहन यावेळी करण्यात आले. महाविद्यालय आणि नगरपंचायतीच्या या संयुक्त उपक्रमातून पर्यावरण संरक्षण आणि शाश्वत विकासाचा महत्त्वपूर्ण संदेश नागरिकांपर्यंत पोहोचविण्यात आला.