काँग्रेसकडून विधानपरिषद मतदारसंघांसाठी तीन उमेदवार जाहीर; नागपुरातून ॲड. वंजारी पुन्हा रिंगणात
अमरावती शिक्षक मतदारसंघातून पोहरे तर पुणे शिक्षक मतदारसंघातून जयंत आजगावकर यांना संधी
काँग्रेसचे राष्ट्रीय अध्यक्ष मल्लिकार्जुन खरगे यांनी शुक्रवारी रात्री उशिरा विधानपरिषदेच्या तीन मतदारसंघांतील अधिकृत उमेदवारांची घोषणा केली आहे. यामध्ये नागपूर विभागीय पदवीधर मतदारसंघातून विद्यमान आमदार ॲड. वंजारी यांना पक्षाने पुन्हा उमेदवारी दिली आहे. तसेच अमरावती विभाग शिक्षक मतदारसंघातून पोहरे आणि पुणे विभाग शिक्षक मतदारसंघातून जयंत आजगावकर यांना काँग्रेसने उमेदवारी जाहीर केली आहे.
अमरावती आणि पुण्यात काँग्रेसचे उमेदवार निश्चित
काँग्रेस पक्षाने जाहीर केलेल्या उमेदवारांच्या यादीनुसार, अमरावती विभाग शिक्षक मतदारसंघासाठी पोहरे यांच्या नावावर पक्षाने शिक्कामोर्तब केले आहे. यासोबतच पुणे विभाग शिक्षक मतदारसंघात जयंत आजगावकर यांना काँग्रेसने मैदानात उतरवले आहे. काँग्रेसचे राष्ट्रीय अध्यक्ष मल्लिकार्जुन खरगे यांनी शुक्रवारी रात्री उशिरा या उमेदवारांची अधिकृत घोषणा केली.
नागपूर पदवीधर मतदारसंघातील लढत ठरणार लक्षवेधी
या उमेदवारी घोषणेनंतर नागपूर विभागीय पदवीधर मतदारसंघातील लढतीकडे राजकीय वर्तुळाचे विशेष लक्ष लागले आहे. मागील निवडणुकीत ॲड. वंजारी यांनी भारतीय जनता पक्षाचे उमेदवार संदीप जोशी यांचा पराभव केला होता.
हा विजय मिळवून ॲड. वंजारी यांनी हा मतदारसंघ काँग्रेसच्या ताब्यात आणला होता. भाजपचा पारंपरिक बालेकिल्ला राहिलेल्या नागपूर पदवीधर मतदारसंघात वंजारी यांनी विजय संपादन करून स्थानिक राजकीय समीकरणे बदलून टाकली होती. त्यामुळे पक्षाने या जागेवर पुन्हा विद्यमान आमदारालाच संधी दिली आहे.
